Author: kirilicamk

Ти само, што ми идеш на сон,
од денот – в предел темно-мрежен
ти една само можеш да кажеш
колку сум тих, и дури нежен.

Иако сонот ми дал право
да сложам сенка на секо чело,
искрено кажи: дали сум те
навредил, еднаш, со какво дело?

Не! Силен, сепак сум се клонел
на власта своја да се решам, –
да не би да ме намразиш тајно,
да не ми идеш, ако ти згрешам.

„Нежност“ препеана од Диме Поповски

Загрепскиот квартет „Чуи“ (Chui), има сосема поинаков пристап кон џез музиката и често експериментира фузирајќи џез со електронска музика, даб, рок, фанк, па дури и пост-рок и амбиентална музика. Во 2012 година, преку дискографската куќа Dancing Bear го објавуваат својот прв албум насловен „Chui“. Досега имаат идадено 6 студиски албуми, последниот насловен „Zagreb-Berlin“ објавен во 2022 година. Седум пати ја добиваат најпрестижната хрватска награда „Порин“ во различни категории и четири пати ја добиваат наградата „Rock&OFF“ на независните музички новинари. Од соработката со џез оркестарот на Хрватската Радио Телевизија и со легендарната Јосипа Лисац произлезе прекрасната композиција „Tebi putujem“.

„Чуи“ настапија на последната вечер од тридневниот фестивал „Крај Вардарот џез“, организиран од дискографската куќа „ПМГ Џез“.

„Чуи“ го нарекуваат и бенд за „не-џезери“, што во никој случај не би требало да се протолкува погрешно. Џезот не треба да биде музика за елитите. Џезот се менува, како што се менуваме и ние. Џезот е за сите. Затоа „Чуи“ се посебно доживување.

Чујте ги „Чуи“ и самите проценете!

Дигиталниот начин на цртање, воведе дебата за етиката на уметноста. Многумина сметаат дека технологијата ги плени уметниците и креативците.
Но за децата цртежот е природен процес. Од детството, децата започнуваат со експериментирање со цртање и цртежот е начин на детето да го изрази своето разбирање за светот и работите што му се важни.
По тој повод беше објавен конкурс за стрип за деца и млади од основните и средни училишта, објавен од страна на Стрип центарот на Македонија – Велес, а потоа и завршна изложба од грантот „За нашите соседи и пријатели“.

Како дел од проектот со наменски стрип и како член на жири комисијата, разговаравме со стрип авторката и илустраторка Славица Купенкова.

За каков конкурс станува збор?

Се работи за стрип конкурс за деца од основни и средни училишта, каде малите уметници беа оставени слободно да се изразуваат преку нивните цртежи во табли. Добивме одлични и уникатни стрипови од деца и тинејџери кои ја изразија својата креативност и емпатија.

Зошто стрипот е популарен?

Сите ги знаеме придобивките од цртање како што се развивање на фини моторни вештини, подобрување на координација рака-око, визуелна анализа и концентрација итн. Воопшто стрипот е многу е популарен, но и корисен бидејќи преку значењето на сликите, децата се охрабруваат да „читаат меѓу редови“. Со говорниот балон, стриповите го поттикнуваат читањето на визуелен начин и преку цртежи и слики помагаат да разберат некои посложени човечки емоции, а предизвикувајќи желба за читање секако дека ја подобруваат и вербалната интелигенција.

Како сте вие, како стрип авторка, задоволна од квалитетот на испратените стрипови?

Нашите учесници имаат огромна почит кон цртањето и сум воодушевена од нивната работа. Воедно преку тематскиот стрип, забележав дека децата и младите се воини за социјална правда со силна толеранција и емпатија. Преку цртежот многу често изразуваат важен настан што се случува во нивниот ум – реален или замислен. Можат да нè научат многу и бесценето е времето поминато со децата за да се потсетиме и ние возрасните на некои едноставни животни лекции.

Дали беше организирана завршна изложба за наградените учесниците?

Секако следеше и завршна изложба во локалната библиотека „Гоце Делчев“ во Велес. Во категорија на ученици од средни училишта и во категорија на ученици од основни училишта беа наградени со прво, второ и трето место, а беа доделени и награди за најдобар цртеж, најдобро сценарио и една специјална награда. Среќна сум што нашите млади уметници ни укажаа доверба со своите уметнички дела.